Hêrişê vera Zîndanê Evîne yê Tahranî de goreyê eşkerayîyanê fermîyan 8 tepişteyan dinyaya xo bedilnaye û 61 kesî birîndar bîyî. Goreyê çimeyanê bînan rewşe giranêr a.

Paytextê Îranî Tahran de Zîndanê Evîne  yo ke pê îşkenceyî yeno naskerdene de vizêr şewat vejîya û tira vengê tifingan û alarman bîyêne berz.

Sîteyê Online yê Mîzanî yo ke pabesteyê Wezîrîya Edaletî yê Îranî yo vat 8 tepitşeyî dûyî ra fatisyayî û 61 kesî birîndar bîyî. Eynî sîteyî îda ker ke kesê merdî rîyê sûcê tecawuzî ra amebî mehkumkerdene. Dimenê ke medyaya sanale de ameyî parekerdene de yeno vînayene ke zîndanî ser o dû  beno berz û vengê tifingan yeno. Goreyê sîteyê Mîzanî têna des tepişteyî wedarîyayî nêweşxnae û rewşa çar kesan giran a. Berpirsîyaranê zîdanî ard ziwan ke înan şewat girewto binê kontrolî.  Nê berpirsîyaran eşkerayîyanê xo yê verênan de îda kerdbi ke tepitşeyanê ''serserîyan'' reyde pêkewtişî qewimîyayî. Seba ke têna bi destê dewlete zîndanî ra  xeberî yenê dayene raştîye de çew nêzano zîndan de sebeno.

Protestoyanê Jîna Emînî de zafê çalakwanê ke ameyî tepiştene Zîndanê Evîne de yenê tepiştene. Zîndano ke pê îşkenceyî yeno naskerdene bi seyan tepişteyê sîyasîyî est ê. Derheqê rewşa tepitşeyan de zanayîş nêame girewtene. Xeylêk beşanê zîndanî ra qet zanayîş nîno girewtene la derheqê tay beşan de  medayaya sanale de zanayîş ame parekerdene. Goreyê sîteyê înternetî yê 500Tasvirî  xeylêk tepişteyî pê guleyan birîndar bîyî.  Goreyê nê sîteyî leşkerêko payeberz  pê zorî kewt koguşê 8ine û vat ''semedê şima wextî merdî ame.'' Eynî sîte vat bi desan tepişteyî raştê şîdetî ameyî.