Zurfî vedikişe û Kazimî tê raspardin
Çavkanîyek taybet ji Rûdawê re ragihand, di 24 demjimêrên bê de, Ednan Zurfî ji erka pêkanîna kabîneyê vedikişe û Mistefa Kazimî bo pêkanîna kabîneya nû ya hikûmeta Iraqê tê erkdarkirin.
Navenda Nûçeyan - Li gor zanyarîyên çavkanîyek taybet, Ednan Zurfî dê ji erka pêkanîna kabîneya nû ya hikûmeta Iraqê vekişe.
Her li gor wî çavkanîyê taybet, Serokomarê Iraqê Berhem Salih, di heyama 24 demjimêran de, dê Mistefa Kazimî ji bo pêkanîna kabîneya nû ya hikûmeta Iraqê erkdar bike.
Ev yek piştî wê tê ku Serokê Herêma Kurdistanê Nêçîrvan Barzanî, di daxuyanîyekê de ragihandibû Serokatîya Herêma Kurdistanê ji ber bawerîya bi aramî û seqamgîrîya sîyasî û ewlehîya Iraqê û amadebûn bo karê cidî, piştevanîya Mistefa Kazimî bo posta serokwezîrîya Iraqê dike.
Nêçîrvan Barzanî herwiha daxwaza piştevanîya hemû alîyan bo Kazimî û pêkanîna hikûmeta nû li Iraqê jî dike û dibêje: “Em daxwaz ji hemû alîyan jî dikin, piştevanîyê bikin daku di zûtirîn dem de erkên pêkanîna hikûmetê temam bike.”
Herwiha piranîya alîyên Şîe li dijî Ednan Zurfî helwest wergirtine û herî dawî ragihandibûn ku ew piştgirîyê li kandîdkirina Mistefa Kazimî dikin.
Mistefa Kazimî, Serokê Dezgeha Istixbarata Iraqê ye û pêştir egera berbijêrkirina wî rastî nerazîbûn û dijatîya alîyên Şîe hatibû, lê niha helwesta partîyên Şîe yên Iraqê hatîye guhertin.
Rudaw
NÛÇEYE ŞÎROVE BIKE
JI kerema xwe re şîroveyên xwe jî bi gramera kurdî ya rast û tîpên kurdî binivîsin